BUTUAN CITY – Gihukman og tibuok kinabuhi nga pagkabilanggo ang mga masterminds sa Kapa Community Ministry International, Inc. kon KAPA, ang gibansagang pinakadako nga investment scam sa kasaysayan sa Pilipinas tungod sa kasong syndicated estafa, human ang case build-up sa Securities and Exchange Commission (SEC) tungod sa ilang illegal investment-taking activities.
Sa desisyon nga gipagawas sa Branch 33 sa Regional Trial Court (RTC) ning siyudad sa Butuan, nahukmang guilty beyond reasonable doubt sa walo ka ihap sa kasong syndicated estafa sila KAPA leaders Joel Apolinario, Cristobal Baradad, ug Joji Jusay.
Si Apolinario nga gil-ila sa grupo sa bansag nga Pastor Joel, mao ang founder ug presidente niini samtang sila Baradad ug Jusay, ang ilang mga incorporators.
Gawas sa maong hukom, gimanduan usab sila pagbayad sa actual damages nga musuma total ngadto sa P195,000.00 ngadto sa mga reklamante.
Nakita sa RTC ang tanang elemento sa estafa nga present sa maong kaso tungod sa sayop o kaha misrepresentation nga gihimo ni Apolinario ug ubang mga akusado dihang ilang gi-angkon nga otorisado silang mulambigit sa profit-making venture o kaha negosyo.
Ang maong kaso gi-prosecute nila Assistant City Prosecutor Claudine Calo ug City Prosecutor Aljay Go.
