BUTUAN CITY– Minglagak og piyansang P90,000 si kanhi Senator Ramon “Bong” Revilla Jr. sa kasong graft kalabot sa P92.8 million ghost flood control project sa Pandi, Bulacan.
Ang gilagak nga piyansa ni Revilla alang lang sa kasong graft sa Fourth Division Clerk of Court niadtong hapon sa Martes, Enero 20 tungod walay katugbang nga piyansa ang kaso niining malversation.
Kini nagpasabot nga dili gihapon makagawas si Revilla samtang nakasang-at ang kasong malversation sa anti-graft court.
Sa pagkakaron, nakadetine si Revilla sa New Quezon City Jail sa Payatas, base sa commitment order nga gipagawas sa Sandiganbayan Third Division.
Nag-atubang ang kanhi Senador sa mga kasong graft ug malversation of public funds through falsification of public documents sa Sandiganbayan Fourth ug Third Division.
Ang mga kaso gipasaka sa Office of the Ombudsman human ang gihimong imbestigasyon sa pakigtambayayong sa Department of Justice kon DOJ, kung asa adunay nakita nga probable cause nga walay proyektong nahimo bisan gidekalara na kining kompleto na o humana.
