BUTUAN CITY-Gideklara na sa Pre-Trial Chamber I sa International Criminal Court kon ICC kagahapong adlawa Lunes, Enero 26, 2026 nga “fit to take part in the pre-trial proceedings” si kanhi Pangulong Rodrigo Duterte.
Ang desisyon gibase sa resulta sa medical examination nga gihimo sa tulo ka independent experts, kinsa minghatag og taho nga kaya ni Duterte nga epektibong magamit ang iyang procedural rights sa korte.
Tungod niini, ipadayon sa ICC ang pre-trial proceedings batok sa kanhi Presidente. Sa opisyal nga pamahayag, gibutyag sa Chamber nga kontento sila nga si Duterte adunay kapasidad sa pag-exercise sa iyang mga katungod sa proseso ug ang pre-trial proceedings magpadayon.
Kalabot niini, gikatakda usab sa ICC ang pagsugod sa confirmation of charges hearing sa Pebrero 23, 2026. Ang maong hearing mao ang mosunod nga yugto sa proseso diin susihon ug pormal nga ipresentar ang mga kaso batok sa kanhi Presidente.
Ang desisyon nagpasabot nga magpadayon ang legal nga proseso sa internasyonal nga korte ug dili na mapugngan ang pag-uswag sa kaso samtang gi-konsiderar nga physically ug mentally capable si Duterte sa pag-atubang niini.
