BUTUAN CITY – Gi-angkon ni kanhi Pangulong Rodrigo Duterte sa iyang pagtambong sa hearing sa Senate Blue Ribbon Committee nga siya ang manubag sa tanang kalampusan ug kapakyasan dihang iyang gipatuman ang war-on-drugs ug dili ang mga pulis nga misunod lang sa iyang kamanduan.
Sa sinugdanan pa lang sa pagdungog, mihangyo pa kini sa mga senador nga dili nila siya trataron nga presidente o kaha higala kondili, usa ka witness aron masayran sa ngadto-ngadto kung mugawas ang kamatu-uran. Gisaysay sa kanhi pangulo nga ang iyang mandato isip presidente, mao ang pagprotekta sa nasud ug sa katawhang Filipino.
Gisultihan pa niini ang Senado nga dili kwestyunon ang iyang mga palisiya ilabina nga dili matud pa siya angayang mangayo og pasaylo ug dili mag-excuse tungod kay gihimo lang matud pa niya ang angayang himuon. Mutuo man o dili ang mga nag-imbestiga sa iyang duguong war-on-drugs, iyang giklaro nga iya kining gihimo alang sa Pilipinas. Giklaro pa niini nga ang iyang kampanya batuk sa ilegal nga druga dili aron mupatay og mga tawo kondili aron protektahan ang mga tawong inosente ug kadtong wala’y ikasarang aron depensahan ang ilang kaugalingon.
Dugang pa sa kanhi pangulo, kanunay niyang gipahinumdom sa mga pulis nga atol sa mga police operations, siguraduhon nilang dili nila ma-ilo ang iyang mga anak, asawa o bana ilabina sa mga panahon nga musukol ang ilang subject nga drug personality.
Dili matud pa niya kayang madawat nga duna’y iyang sakop nga mga pulis nga mamatay tungod kay na-unhan sa mga tawong subject sa ilang operasyon.
