BUTUAN CITY – Gi-angkon ni kanhi Pangulong Rodrigo Duterte sa pagdungog sa House Quad Committee nga personal niyang gipatay ang unom hangtud pito ka mga indibidwal nga gibansagang mga kriminal niadtong siya pa ang mayor sa Davao City.
Gi-angkon kini sa kanhi pangulo sa iyang pagtambong sa sa pagdungog sa Quad Comm nga nag-imbestiga sa gika-ingong extrajudicial killings (EJKs) ilalom sa iyang administrasyon. Kini human siya gipangutana ni Gabriela Party-list Rep. Arlene Brosas kung duna na ba siya’y napatay dihang siya pa ang mayor sa maong siyudad. Tubag sa kanhi pangulo, duna siya’y gipusil apan wala na niya na-follow up kung nadayunan kini.
Gidugang sa kanhi pangulo na siya matud pa ang nagpatrolya siya sa kadalanan sa ilang siyudad gamit ang motorsiklo ug mala-umong duna siya’y ma-engkwentro nga mga kriminal.
Gipamugos ni Brosas ang tulubagon ni Duterte sa EJK ug gihagit niini nga angkunon niya sa publiko nga duna siya’y tulubagon sa tanang nahitabong kamatay. Subling gibarugan ni Duterte nga siya ang responsable sa tanang nahimo sa mga pulis tungod sa iyang kamanduan.
Gipangutana pa ni Brosas ang kanhi pangulo kalabot sa Davao model approach sa iyang gipatumang national anti-drug campaign. Wala kini gitubag ni Duterte apan gibuweltahan niini si Brosas ug napangutana pa kung unsa’y gihimo niini ning mi-aging alas-kwatro sa hapon dayong rason nga dili siya angayang patubagon lang og yes or no.
