BUTUAN CITY – Nakauli na sa Pilipinas si Bise Presidente Sara Duterte human sa halos usa ka buwan niining pagpundo sa The Hague, Netherlands arun pagpahiluna sa amahan niining si kanhi Pangulong Rodrigo Duterte.
Mitugpa ang gisakyan niining Emirates Airlines flight no. EK 334 sa Bise Presidente sa Ninoy Aquino International Airport (NAIA) pasado alas-9:56 kagabii. Human ang halos usa ka buwan nga pagkadetine sa Scheveningen Prison sa The Hague, gusto matud pa sa kanhi pangulo nga maka-uli na sa labing dali nga panahon tungod sa nagkaluya na niya nga lawas ug posible matud pang mamatay na siya bisan unsang orasa.
Gipadayag matud pa kini sa iyang amahan sa usa ka oras niyang pagtawag sa telepono kondiin emosyunal ug direkta ang kanhi presidente sa pamahayag ug kagustuhan niining mamatay sa iyang nasud.
Gipaniguro sa besi presidente ngadto sa iyang amahan nga ang ilang legal team pagpanguna ni British-Israeli lawyer Nicholas Kaufman kada-adlaw nga nagtrabaho alang sa iduso nila nga interim release niini.
Kung matugutan, posibleng buhian ang kanhi pangulo ngadto sa laing nasud nga membro sa ICC inay nga dalhon kini dinhi sa Pilipinas.
Samtang gipadayag usab ni Kaufman nga iyang himuon ang tanan ug dili niya kini biyaan hangtud nga madag-an ang kaso sa kanhi pangulo.
