BUTUAN CITY – Human kang Vice President Sara Duterte, gitawag na usab ni Alliance of Concerned Teachers kon ACT party-list Rep. France Castro nga nukos si kanhi Pangulong Rodrigo Duterte tungod sa wala niini pagtambong sa quad committee hearings kaganina.
Atol sa ikasiyam nga quad committee hearing kaganina, gipadayag ni Castro nga pareho lang ang mag-amahan nga isog lang kung anaa sa gawas sa Kongreso. Isog lang matud pa mangistorya ang amahan ug anak kung dili under-oath ang ilang pamahayag apan mukakak kung atubangan na sa kamara ilabina nga manumpa sila isip pamatuod nga ang ilang isulti, wala’y lain kondili ang kamatu-uran.
Madumdumang namugna ang bansag nga nukos kon pusit ni Castro kang VP Sara niadtong Augusto 27, tungod sa paglikay-likay niini pagtubag sa mga pangutana kalabot sa paggamit sa confidential sa Office of the Vice President.
