BUTUAN CITY – Patay nang napalgan ang kanhi membro sa bandang One Direction nga si Liam Payne human matud pa nahulog sa iyang gisak-ang sa Buenos Aires, Argentina. Sigon sa mga nakakita, nahulog ang 31-anyos nga singer gikan sa ikatulong andana sa iyang gisak-ang kuwarto sa CasaSur Palermo Hotel.
Nasayrang atua sa Argentina ang singer alang sa Niall Horan concert karong buwana kondiin gikatakda unta silang mag-reunion sa maong show. Madumdumang nag-edad pa lang og 16-anyos si Liam dihang misalmot sa One Direction. Misikat ang grupo niadtong 2010 dihang misalmot sila sa “The X-Factor” hangtud nga nagkabuwag-buwag niadtong 2015.
Tuig 2021 dihang gi-angkon ni Liam nga na-adik siya sa pag-inom ug paggamit sa droga kondiin pila ka higayon na usab kining misulay sa pagpakamatay. Padayon pang gipakisayran sa mga otoridad sa Argentina kung aksidente o gituyo ang pagkahulog sa singer.
