BUTUAN CITY – Gikumpirma ni P/Supt. Martin Gamba – information officer sa Police Regional Office kon PRO-13 nga nasigpatan pa dinhi sa dakbayan sa Butuan kagahapon si kanhi Marawi City Mayor Fajad Pre Umpar Salic adiser kini nadakpan sa national highway sa Barangay San Martin, Villanueva, Misamis Oriental.
Sa eksklusibong pakighinabi ning sibyahan, gipadayag sa opisyal nga gipanubayan pa nila kung asa kini gikan human nakalusot sa mga checkpoints dinhi sa Caraga Region.
Apil sa ilang gisusi kung asa sa upat ka mga regional boundaries kini gikan partikular kung gikan ba kini milusot sa mga boundaries sa Davao Oriental, Region 8, Region 10, og sa Compostela Valley.
Gidugang ni Supt. Gamba nga ang tanang impormasyong nadawat na og madawat pa sa ilang buhatan, wala nila gibalewala aron ma-establisar nila kung asa gikan ang kanhi mayor og kung nganong naka-abot kini dinhi sa Caraga Region.
Hinuon, hangyo niini sa tanan nga ipaabot gilayon sa pinakaduol nga law enforcement agency sama sa buhatan sa kapulisan ang impormasyong madawat ilabina kung duna’y kalabutan sa mga terorismong kalihukan aron ma-aksyunan gilayon sa kapulisan.
Mahinumdumang nag-atubang og kasong rebelyon sa Korte si Salic human gi-akusahang apil matud pa sa mga nagpaluyo sa pag-atake sa mga teroristang Maute og Abu Sayyaf Group sa Marawi City kansa hugot usab niyang gipanghimakak. (Beth Ruiz)
