Kanhi Marawi City Mayor Salic, na-isyuhan og barangay ID sa Butuan City

BUTUAN CITY – Gi-angkon ni Barangay Kapitan Efren Acaso sa Barangay Holy Redeemer ning siyudad sa Butuan nga na-isyuhan niya ug Barangay ID si kanhe Marawi City Mayor Fajad Pre Umpar Salic adiser nadakpan sa national highway sa Barangay San Martin, Villanueva, Misamis Oriental sa nakalabay’ng mga adlaw.
Apan gitin-aw ni Kapitan Acaso nga tumong sa pag-isyu niya ug Barangay ID sa kanhe mayor, mao ang pagtabang sa mga Maranao nga makabaton ug identity.
Hinoon gi-angkon sa kapitan nga wala niya personal nga naka-estorya o nakita ang mayor, apan familiar niya ang nawong niini tungod kay mag-ngadto nganhe ra kini sa iyang barangay tungod sa mga paryente niini.
Giklaro usab ni kapitan nga wala siya nahibalo nga ang nahatagan niya ug Barangay ID. kanhe mayor sa Marawi City ug nag-atubang pa sa kasong rebelyon.
Nasayrang apil sa nakuha sa otoridad nga mga mga ID sa nadakpang kanhe mayor, mao ang Barangay ID nga pirmado pa ni Barangay Kapitan Acaso. (Rolan Janea)