BUTUAN CITY – Padayon pa ang gihimong imbestigasyon sa kapulisan sa del Carmen sa Siargao Island lalawigan sa Surigao del Norte aron maila ang mga lalaking mipusil sa kanhi huwis sulod sa iyang balay og aron matino ang motibo niini.
Migawas sa inisyal nga imbestigasyon nga gisulod matud pa sa upat ka mga armadong lalaking naka-itom ang kwarto sa tulog pang biktimang si Exequil Dagala samtang gigakos ang 9-anyos niining anak.
Nakita matud pa sa working student sa biktima og sa duha niini ka mga classmates ang pagsulod sa mga suspek diha sa garahi-an, kinsang bitbit nga armas duna’y silencer diin gipahapa sila dayong saka sa taas.
Yano lang matud pang naggawas ang mga suspek dayong sibat sakay sa puti nga van rason nga gidali nila og saka ang taas nga bahin sa panimalay,
Didto ila na lang nakita nga nagkadugo na ang ulo sa biktima samtang misinggit ang anak rason nga ila gilayon kining gidala sa ospital.
Nasayrang wala sa ilang pinuy-anan ang asawa sa biktima nga si Sangguniang Bayan member Genelou Petallo tungod sa pagdalikyat niini sa Surigao City. Nasayran nga usa ang kanhi judge sa gipanganlan kaniadto ni Pangulong Rodrigo Duterte nga nalambigit sa illegal nga druga.
Si Dagala mao ang kanhi huwis sa Municipal Trial Court sa lungsod sa Dapa, Surigao del Norte kinsa gipalagpot sa Korte Suprema tungod sa imoralidad.
Misulay kini pag-resign niadtong tuig 2016 apan gipugnan kini sa Korte Suprema aron ma-imbestigahan sa iyang kalambigitan sa illegal na druga.
