BUTUAN CITY-Nakakita ang minority bloc sa Senado nga si kanhi House Speaker Martin Romualdez mahimong liable tungod sa iyang pagka-komplis o pagkapabaya sa anomalya nga nahitabo sa flood control scandal.
Sa ilang 576‑page report nga gi‑pirmahan sa unom ka senador ug gisumite sa opisina ni Senate President Vicente Sotto III, gipunting nga si Romualdez dili makalikay sa accountability tungod sa alegasyon nga nakadawat siya og kickbacks gikan sa mga proyekto sa Department of Public Works and Highways, sumala sa testimonya ni Orly Guteza.
Lakip sa report ang daghang opisyal ug kontraktor nga giingong nalambigit, ug gihatag usab ang posibleng mga kaso nga ilang atubangon sama sa Anti‑Graft and Corrupt Practices Act, Direct Bribery, Malversation of Public Funds, ug Anti‑Plunder Act.
Gipunting sa minority bloc nga ang report makatabang sa Senado aron masiguro ang accountability, transparency, ug integridad sa mga programa sa pampublikong imprastruktura.
