BUTUAN CITY – Namatay ang kanhi House Speaker Jose de Venecia Jr. niadtong Martes kaganina sa edad nga 89-anyos, base na sa pagkumpirma ni Dagupan City Mayor Belen Fernandez.
Sa iyang Facebook post, gibutyag ni Mayor Fernandez nga dako kaayo ang kontribusyon ni De Venecia sa nasud ug ilabina sa Dagupan City, nga maoy iyang lugar nga natawhan.
Si De Venecia nahimong Speaker sa House of Representatives gikan 1992 hangtod 1998 sa panahon ni kanhi Pangulong Fidel V. Ramos, ug gikan 2001 hangtod 2008 sa termino ni kanhi Pangulong Gloria Macapagal-Arroyo.
Matod sa mayor, nagbangutan ang Dagupan sa iyang pagpanaw ilabina nga sa iyang nahinumdoman, si De Venecia usa ka lider nga mitabang pagbangon sa siyudad human sa kusog nga linog niadtong 1990.
Tungod sa iyang liderato ug tabang sa pondo gikan sa gobyerno, nakabangon ug mas nahimong lig-on ang Dagupan City.
Dugang pa ni Mayor Fernandez, ang pagkapanulundon ni De Venecia makita gihapon sa kauswagan sa siyudad ug madumduman siya sa iyang pakig-uban niadtong mga pamilya nga namatyan.
