BUTUAN CITY – Gihukman sa Sandiganbayan 3rd Division og 16 ka tuig nga pagkabilanggo ang kanhi mayor ning dakbayan sa Butuan nga si Dr. Ferdinand Amante Jr. tungod sa procurement ug shipment sa usa ka depektuso nga computerized tomography kon CT scan machine nga nagkantidad og 15-milyunes pesos gikan sa Estados Unidos.
Sa 54 ka palid nga desisyon nga gipakanaog niadtong Oktubre 14, nahukmang guilty sa Sandiganbayan ang kani mayor sa paglapas sa Sections 3(e) ug 3(g) sa Republic Act 3019 kon mas nailang Anti-Graft and Corrupt Practices Act.
Gihukman si Amante og tag-unom ngadto sa walo ka tuig nga pagkabilanggo sa matag-kalapasan kon kinatibuk-ang 12 ngadto sa 16 ka tuig sa duha ka kalapasan ug gi-disqualify usab siya sa 3rd Division pagkupot og buhatan sa gobyerno.
Ang kaso nga gipasaka sa Office of the Ombudsman niadtong tuig 2018, nagsumikad sa pagbayad sa lokal nga kagamhanan sa Butuan og P15.49 million nadto sa World Medical Relief-Philippines (WMR-P), usa ka non-profit organization nga nakabase sa Panabo, Davao City niadtong 2012 kansa atol sa iyang katungdanan isip mayor ning siyudad.
Ang maong bayad, alang sa shipment sausa ka Positron Emission Tomography-Computerized Tomography scan machine nga gi-donate dinhi sa Butuan pinaagi sa usa ka US-based non-profit organization, ang World Medical Relief Inc. niadtong Hunyo 2013.
Sigon sa Ombudsm an, gitugutan ni Amante ang full payment ngadto sa WMR-P nga wala man lang una gisiguro nga anaa sa maayong kondisyon ang nasangpit nga makina.
Ulahi na matud pa nga nasuta nga ang maong CT scan machine dili operational ug dili magamit hinungdan nga gibalik kini ngadto sa donor gamit ang kwarta sa city government kansa usa ka pagpasagad.
Gipirmahan ni Associate Justice Bernelito Fernandez ang desisyon nga gi-uyunan usab nila Third Division chair ug Sandiganbayan Presiding Justice Amparo Cabotaje-Tang ug Associate Justice Ronald Moreno.
