BUTUAN CITY – Gihukman og unom ngadto sa napulo ka tuig nga pagkabilanggo ingon man perpetual disqualification gikan sa pagkupot og public office si kanhi Butuan City Mayor Leonides Theresa Plaza uban sa lain pang pito ka mga local officials.
Kini human gikonbikto sa Sandiganbayan 3rd Division sa duha ka ihap sa kasong graft ang kanhi mayor subay na sa 2004 fertilizer fund scam.
Sa 73 ka palid nga desisyong gipagawas sa anti-graft court, gihukman niining guilty ang kanhi mayor samtang guilty usab sa tag-usa ka ihap sa kasong graft sila Salvador Satorre, Adulfo Llagas, Arthur Castro, Rodolfo Evanoso, Bebiano Calo, Danilo Furia, ug Melita Galbo.
Subay kini sa ilang paglapas sa sections 3(e) ug 3(g) sa Anti-graft and Corrupt Practices Act kalabot sa pag-purchase sa 3,333 ka mga botelya sa liquid fertilizers gikan sa Feshan Philippines, Inc. sa kantidad nga P1,500 matag-usa kansa overprice ug 1,000 percent.
Sigon ni Associate Justice Ronald Moreno, nasuta sa Office of the Ombudsman ug sa Commission on Audit nga ang maong mga fertilizers susama ra ang kalidad sa mga festilizers nga nagkantidad og 120 ngadto sa 125-pesos matag-litro.
Gibutyag sa Sandiganbayan nga gibalewala ni Plaza ang mga proseso sa Government Procurement Reform Act o kaha gipirmahan lang niini ang mga dokumento human nakita nga una nang mipirma niini ang maong mga opisyal.
Duna usa’y panagkunsabo tali sa akusado ug sa representante sa Feshan nga si Lucio Lapidez, tungod sa pagdali-dali sa procurement process alang sa kaayuhan sa kompanya taliwa nga makadaut kini alang sa dakbayan sa Butuan.
Gimanduan usab ang kanhi mayor nga mubayad og 4.5-milyunes pesos ngadto sa Butuan City government.
Ang maong desisyon parehong gi-uyunan nila Presiding Justice Amparo Cabotaje-Tang ug Associate Justice Bernelito Fernandez.
