BUTUAN CITY – Tanggong karon sa Butuan City Police Station 1 ang kanhi kapitan sa Brgy. New Society Village ning siyudad human nadakpan dihang palarga na unta padulong sa kauluhang Manila aron didto obserbahon ang Ramadan.
Nadakpan sa kapulisang sakop sa Police Regional Office kon PRO-13 og PRO-10 ang wanted nga si Marco Banuon Imam, 47-anyos, minyo og residente sa Purok 6, Narra Road sa nasangpit nga barangay. Natigayon ang pagkasikop pasado alas-nueve kagabii sa Laguindingan Airport sa Cagayan de Oro City.
Nasayrang na-isyuhan siya og arrest warrant tungod sa paglapas sa Section 2 sa RA 9165 kon mas nailang Comprehensive Drugs Act of 2002 human misibat dihang gi-raid ang iyang pinuy-anan kondiin duna’y narekober nga suspected shabu.
Sa eksklusibong interview ning sibyahan, gibutyag sa kanhi kapitan nga gikalipay niya ang pagkasikop sa mga otoridad ngadto kaniya tungod kay dinhi na masugid ang kamatu-uran sa maong hitabo. (Beth Ruiz)
