BUTUAN CITY – Naaresto na si kanhe Negros Oriental Representative Arnolfo “Arnie” Teves Jr. Sumala sa Department of Justice kon DOJ, giaresto siya sa mga otoridad sa Timor-Leste. Nag-atubang si Teves og kasong murder, frustrated murder ug attempted murder tungod kay sya ang gitudlong mastermind sa pagpatay kang Negros Oriental Governor Roel Degamo niadtong Marso 4, 2023.
Nasayrang human sa insidenteng pagpatay, nagtago si Teves sa Timor-Leste diin misulay sa pagkuha og asylum apan gibalibaran sa maong nasud. Gawas sa pagpamusil kang Degamo gikasuhan usab kini sa pagpatay sa tulo ka indibidwal sa Negros Oriental niadtong 2019. Niadtong Agosto 2023 usab gideklara siya kauban ang 11 pa isip terorista tungod sa gikalambigitang pagpatay ug harassments sa Negros Oriental. Samtang niadtong Agosto gipahawa kini sa House of Representatives tungod sa disorderly conduct ug ang taas nga wala pagtambong sa mga sessions bisan og expired na ang iyang travel authority.
Niadtong Pebrero gibutang si Teves sa red notice list sa International Criminal Police Organization kon INTERPOL. Ang red notice usa ka hangyu sa mga alagad sa balaod sa tibook kalibutan aron matumbok ang nahimutangansa tawo nga dunay extradition aron kini musurender ug arestuhon.
