BUTUAN CITY – Gimando sa Office of the Ombudsman ang pagpasaka og kaso kang kanhi Sta. Monica, Surigao del Norte Mayor Rosalinda Penera tungod sa paglapas sa Section 3 (e) sa Anti-Graft and Corrupt Practices Act.
Kini may kalabutan sa mga iregularidad matud pa sa disbursement sa mga pundo alang sa ilang Core Shelter Assistance Project kon CSAP balor 980-mil pesos.
Gi-apil sa charge sheet sila municipal officials Dianette Evangelista, Aurea Menil, Gilbert Dagcuta, and Lei Amor Laplana, og private individual nga si Rodolfo Arlan. Nasuta sa mga graft investigators nga si Penera og mga ka-ubanan, mi-apruba og mi-facilitate sa purchase sa usa ka luna sa yuta gikan kang Arlan niadtong tuig 2010 alang sa maong core shelter project.
Makita sa mga dokumento nga gihimo ang purchase nga wala una magpahibalo sa Sangguniang Bayan og taliwa sa kawala’y saktong ordinansa.
Sa maong resolusyon, ang mga public respondents nagpakita matud pa og gross inexcusable negligence gikan sa pagproseso sa mga disbursements sa pundo taliwa nga nasayod sila sa mga iregularidad sa purchase transaction tungod kay mao kini ang ilang functions.
Bisan sa kasayuran nila sa ilang trabaho, gipadayon gihapon nila ang transaksyon hinungdan sa nahatag nga unwarranted benefits ngadto kang Arlan.
Sa susamang kasong administratibo, sila Menil, Evangelista, Dagcuta og Laplana nasutang guilty sa kasong grave misconduct og gimando ang pag-dismiss kanila gikan sa serbisyo.
Gawas pa kini sa ipahamtang nga accessory penalties sama sa hingpit nang pag-disqualify kanila gikan sa pagkupot og katungdanan sa public office og kanselasyon sa ilang eligibility.
Sa kaso sa separation from the service, ang penalty ma-convert ngadto sa multa nga bugti sa ilang usa ka tuig nga suhulan. (Beth Ruiz)
