BUTUAN CITY – Alayon sa nagpadayong hugot nga kampanya kontra loose firearms, nasikop sa otoridad ang kanhe barangay kapitan, kanhe barangay kagawad og incumbent barangay councilor sa simultaneous implementation sa search warrants kagahapon, Abril 4 sa lungsod sa San Miguel, Surigao del Sur.
Giila ni Police Brigadier General Gilberto DC Cruz, Police Regional Office kon PRO-13 director ang mga nadakpan nga sila Al C. Gala, 48-anyos, kanhe kagawad sa Barangay Sagbayan; Glenn T. Tranquilan, 46-anyos, incumbent councilor sa Barangay Sagbayan; ug Alex A. Guillermo, 49-anyos, kanhe kapitan sa Barangay Carromata.
Ang hiniusang operasyon sa Surigao del Sur Provincial Intelligence Branch, San Miguel Municipal Police Station, Surigao del Sur 2nd Provincial Mobile Force Company ug Phil Army, nagabase sa search warrants nga gi-isyu ni Hon. Edwin Malazarte, Presiding judge sa RTC 11, Tandag City, Surigao del Sur.
Nakumpiska sa Operatiba ang kalibre 45 nga pistol nga dunay 7 ka buhing bala gikan kang Guillermo; isa ka homemade improvised shotgun nga dunay magazine ug pito ka buhing bala, cal. 9mm pistola nga dunay duha ka magazines ug 16 ka buhing bala og ang pistolized carbine nga dunay magazine gikan kang Tranquilan samtang sa kang Gala nakuha ang usa ka cal. 45 COLT nga dunay magazine ug tulo ka buhing bala, usa ka homemade improvised shotgun nga dunay tulo ka live ammunition, cal.38 revolver, 5 ka live ammunition, ug airgun.
Ang mga nadakpang suspetsado ang nag-atubang sa kasong pagsupak sa Republic Act No. 10591 o the Comprehensive Firearms and Ammunition.
