BUTUAN CITY – Gibana-banang mo-akomodar ug 60 ka mga tawo ang kampo sa New People’s Army nga nailog sa militar human ang engkuwentro kagahapon nsa alas 2:20 sa hapon sa may Sitio Cogon-Cogon, Tagmamarkay sakop sa lungsod sa Tubay, Agusan Del Norte.
Sigon ni Lt. Romalyn Cabiles, Civil Militar Operation kon CMO Officer sa 29th Infantry Battalion Philippine Army, nakadawat sila og impormasyon gikan sa mga sibilyan sa maong dapit mahitungod sa presensiya sa rebelding grupo.
Dali nila kining gi-respondihan ug didto natigayon ang engkuwentro nga milungtad og 20 minutos. Gibutyag pa sa opisyal nga walay natalang nasamdan o casulty sa han-ay sa kasundaluhan apan dunay nakitang lama sa dugo sa encounter site nga boot pasabot dunay na-igo sa pikas grupo.
Nadiskurihan usab nga usa ka kampo ang maong lugar nga kayang mo-akomodar og 60 ka mga tawo. Lakip sa nakumpiska human sa giyera ang usa ka AK47 nga armas, wire nga gamit sa paghimu ug improvised explosive device, usa ka IED mismo, backpack og mga personal nga gamit.
Tungod niini, mas gi-aghat sa opisyal ang katawhan nga dili magduha-duha sa paghatag ug impormasyon aron masanta ang daotang binuhatan sa walhong grupo.
Samtang nanawagan kini sa tanang naglihok sa kabukiran, nga abli ang militar sa pagdawat kanila ugaling gusto na silang musurender og mobalik sa sabakan sa gobyerno.
