BUTUAN CITY – Opisyal nang gi-atras sa legal defense team ni kanhe Pangulong Rodrigo Duterte ang ilang “request for leave to appeal” sa usa ka confidential decision sa International Criminal Court (ICC).
Gibakwi sa lead counsel sa kanhe Pangulo nga si Atty. Nicholas Kaufman ang hangyu nga “leave to appeal” o pagtugot nga moapela mahitungod sa usa ka “confidential decision” sa ICC Pre-Trial Chamber I.
Gisubmite sa depensa ang pormal na pagbakwi niadtong March 16, 2026, sunod sa usa ka order gikan sa korte niadtong March 13, 2026.
Gitumbok sa depensa nga ang pagbakwi, “without prejudice” boot pasabot mamahimo pa gihapon nilang ipataas ang isyu o magduso og susama nga hangyu sa umaabot.
Ang gibakwing apela mahitungod sa hangyu sa depensa nga i-diskwalipika ang “Common Legal Representatives for Victims” o mga abogado sa mga biktima sa kaso nga sila Atty. Joel Butuyan, Atty. Gilbert Andres, ug ilang Case Manager nga si Atty Nicolene Arcaina.
Nagtoo pa gihapon ang kampo ni kanhe Pangulong Duterte nga dunay conflict of interest sa pagrepresenta sa mga nasangpit nga abogado.
Ang maong lakang ang kabahin sa padayon nga legal battle tali sa depensa ug sa ICC Pre-Trial Chamber I mahitungod sa procedural matters samtang anaa sa kustodiya sa ICC ang kanhe Pangulo sa The Hague, Netherlands.
