BUTUAN CITY- Pormal na nga gi-refer sa House of Representatives kagahapon Lunes sa gabi sa Committee on Justice ang duha ka verified impeachment complaint batok kang President Ferdinand Marcos Jr., human malakip sa Additional Reference of Business sa plenaryo.
Gipangulohan ni Deputy Speaker Yevgeny Vicente “Bambi” Emano ang sesyon dihang gihimo ang referral.
Ang una nga reklamo, nga gipasaka niadtong Enero 19, 2026, gikan kang Atty. Andre De Jesus ug gi-endorso ni Deputy Minority Leader ug Pusong Pinoy Party-list Rep. Jernie Jett Nisay.
Ang ika-duha nga reklamo, nga gipasaka niadtong Enero 26, 2026, gikan sa mga aktibista ug pribadong indibidwal nga gipangulohan nila Liza Maza, Teodoro Casiño, Renato Reyes Jr., Atty. Neri Colmenares, ug Ronaldo “Ka Jerome” Adonis, ug gi-endoros sa ACT Teachers, Gabriela, ug Kabataan party-list representatives.
Human gibasa ang mga titulo sa plenaryo, opisyal nga girefer ang mga reklamo sa Committee on Justice, kansa maoy mo tuki sa igong porma ug unod subay sa Konstitusyon ug sa mga lagda sa Balay Balauranan.
Gipasi-ugda usab sa mga lider sa Kamara nga ang referral wala nagpasabot nga aduna nay desisyon sa merito sa mga reklamo, apan sinugdanan pa lang sa proseso sa legal nga pagrepaso.
