BUTUAN CITY-Gipalig-on sa House of Representatives ang bersyon sa Senado sa sugyot balado-non kansa nagtugot og temporaryong pagkunhod o pagsuspinde sa excise tax sa produktong petrolyo.
Tumong sa maong lakang nga makunhoran ang epekto sa pagsaka sa presyo sa gasolina, diesel, ug uban pang mga batakang panginahanglan sa katawhan.
Sumala ni House Majority Leader Ferdinand Alexander “Sandro” Marcos, ang sugyot usa ka safety valve panahon sa krisis sama sa ksamtangang sitwasyon sa Middle East, kansa nakapahimo og pagsaka sa presyo sa lana ug uban pang nag-unang panginahanglanon.
Ubos sa balaod, posibleng tanggalon sa Presidente ang hangtud P10 matag litro sa gasolina ug P6 sa diesel pinaagi sa temporary suspension o reduction sa excise tax, ubos sa mga partikular nga kondisyon.
Ang sugyot nagtakda usab og duha ka trigger diin una kung mo-abot og $80 matag bariles ang presyo sa Dubai crude oil sa mi-aging duha ka bulan, o ika-duha kung idineklara sa Presidente ang National emergency o kalamidad nga moresulta og grabeng pagsaka sa presyo sa petrolyo.
Ang bisa sa suspension o reduction hangtud unom ka buwan gawas nalang kong patas-an sa Kongreso. Sumala ni House Speaker Faustino “Bojie” Dy III ang nasangpit nga sugyot tubag sa nagpadayon nga krisis sa Middle East.
