BUTUAN CITY – Aminado si Agusan del Norte Governor Dale Corvera kinsa mao usa‘y chairman sa Regional Task Force kon RTF-One Caraga Shield nga wala sila’y laing mahimo kondili sundon ang kamanduan ni Pangulong Rodrigo Duterte nga ibalik sa General Community Quarantine kon GCQ ang tibuok rehiyon.
Kini human nga na-apil ang tanang siyudad ug lalawigan sa Caraga sa mga low-risk areas kon mga lugar nga wala ma-igo og maayo sa COVID-19 pandemic.
Giklaro sa gobernador nga ubos na sa control sa nasudnong kagamhanan ang pagpa-ilalom sa usa ka lugar sa enhanced community quarantine kon ECQ o kaha sa General Community Quarantine kon GCQ.
Gidugang sa opisyal nga sa iyang pakighinabi kang Department of Interior and Local Government kon DILG Secretary Eduardo Año, mamahimo matud pang makaduso ang local government unit o kaha ang regional task force nga imintina una ang ECQ apan kini aprubahan pa sa nasudnong kagamhanan pinaagi Inter-Agency Task Force on Emerging Infectious Diseases kion IATF-EID.
Giklaruhan matud pa siya ni Sec. Año nga ang magbuot-buot pagpatuman og ECQ papanubagon sa kagamhanan pinaagi sa i-isyu nga show cause order ug dili usab hatagan og pundo alang sa Social Amelioration Program ug bahala na ang lokal nga kagamhanan sa paghatag og pundo ng gikinahanglan sa ilang mga constituents.
Samtang nasabutan usab nila sa tigom kagahapon uban sa tanang mayor sa lalawigan ug ni Congresswoman Angel Amante-Matba nga tabangan ang tanang mga residente ning probinsya nga natanggong sa nagkada-iyang lugar sa nasud tungod sa gipatumang ECQ.
Kini pinaagi sa pagpadala sa matag-usa kanila og 5-mil pesos nga bahinon sa matag-lungsod kansa maggahin og 2-mil pesos samtang 3-mil pesos usab ang itagana sa provincial government.
Una nang gitakda ang panagtigom unta ugmang adlawa sa mga membro sa RTF-One Caraga Shield aron hisgutan ang ilang mga buhatong lakang human sa Abril 30 nga mao ang katapusang adlaw sa pagpatuman sa ECQ sa entire rehiyon apan na-unhan kini sa deklarasyon ni Pangulong Duterte.
