BUTUAN CITY – Nanawagan si Pope Leo XIV og kalinaw sa iyang Easter Sunday message ug gihangyo ang mga lider sa kalibutan nga hunongon ang mga giyera ug biyaan ang bisan unsang tinguha sa gahum ug dominasyon.
Sa iyang Urbi et Orbi message, gipadayag sa Santo Papa nga si Hesu Kristo mao ang ehemplo sa hingpit nga kalinaw ug dili bayolente.
Sa iyang Easter message atubangan sa liboang deboto nga nagtigom sa St. Peter’s Square, nanawagan si Pope Leo XIV sa mga lider sa kalibutan nga tapuson ang nagpadayon nga mga giyera sa nagkalain-laing bahin sa kalibutan.
Sumala sa Santo Papa, mura og na-anad na ang mga tawo sa kapintas mao nga importante nga pilion ang kalinaw imbes sa gubat.
Gihangyo usab niya ang mga nasud nga adunay armas nga hunongon ang panagbangi ug ipadayon ang dayalogo. Bisan wala niya hinganli ang partikular nga giyera, klaro ang iyang diretsong panawagan sa mensaheng Urbi et Orbi nga mas mubo apan mas kusog nga mensahe.
Gipasabot niya nga ang pagkabanhaw ni Kristo mao ang pamatuod sa kalinaw ug paglaum nga angay mahimong giya sa katawhan.
