BUTUAN CITY – Malampuson nga narekober sa nakalabay nga adlaw sa kasundaluhan ang kalabera sa usa ka rebelding New People’s Army kon NPA nga gilubong lang sa bukirang parte sa P-3, Minkasi, Brgy Mimbuntong, Gingoog City.
Nasayran nga gihimo ang pagkuha sa kalabera sa napatay’ng rebelde sa mga tropa sa 58th Infantry (Dimalulupig) Battalion, Operational Control unit ilalom sa 402nd Infantry (Stingers) Brigade, Philippine Army. Kini human sa kooperasyon og pagsumbong sa kanhe rebelde nga misurender sa 58IB, Philippine Army.
Saysay pa sa kanhe rebelde, nga usa ka Romy Ayuma ang namatay kansa miyembro sa Guerilla Front 4B of Sub-Regional Committee (SRC) 1. Napatay kini atol sa engkuwentro niadtong Disyembre 2019 og gilubong lang sa tagatuhod nga gilawmon sa maong lugar samtang ang mga rebelde naningkamot sa pagsibat gikan sa puwersa sa gobyerno.
Nagpadayag nalang og pahisubo si BGEN ADONIS ARIEL ORIO, Commander sa 402nd Infantry Brigade sa pamilya sa maong rebelde nga nausik lang ang kinabuhi tungod sa sayop nga idolohiya og pagkailad sa NPA.
