BUTUAN CITY – Gikabalak-ang malugi ang mga mag-uuma sa Cantilan, Surigao del Sur human giake ang mga kaumahan sa maong lungsod og mga brown plant hoppers.
Kahibaloang giatake sa mga peste hopperburn ang usa ka ektaryang humayan sa may Brgy. Parang duol sa Cabas-an padulong sa Malinawa cool spring sa nasangpit nga munisipalidad, rason nga dili na mapahimuslan pa ang nasangpit nga mga pananum.
Subay niini, nakitaan usab og mga hoppers ang mga humayan sa Sitio Toblihon sa nahisgutan gihapong Barangay. Ang maong mga peste, gawas pa sa nakitang mga rice blasts, leaffolder, ingon man mga ilaga nga pulos problema sa mga mag-uuma.
Ang brown plant hoppers, usa sa pinaka gikabalak-ang pest sa mga mag-uuma tungod kay kung modugok, supsupon niini ang duga sa pananum, ug magdala usab kini og mga sakit sa tanom sama sa rice ragged stunt virus ug rice grassy stunt virus nga maoy hinungdan nga malawos ang mga tanom, partikular na ang humay.
Subay niini, giaksyonan gilayon sa Municipal Agriculture Office sa Cantilan ang maong problema, ug pinaagi sa tabang sa Department of Agriculture Regional Crop Protection Center ug sa Provincial agriculturist sa Surigao del Sur, gipangapod-apod ang libreng mga biological control agents. Sa kasamtangan, padayon pa ang pagmonitor sa mga hintungdang ahensya alang sa nasnagpit nga mga apektadong humayan.
