BUTUAN CITY – Gipaneguro ni kanhi Senate President og karon Consultative Committee kon ConCom member Aquilino ‘Nene’ Pimentel Jr. nga dili mahitabo ang gikahadlukan sa mga kritiko ni Pangulong Rodrigo Duterte nga ma-extend pa ang termino niini higayong ma-aprubahan na ang charter change.
Sa eksklusibong interview sa Bombo Radyo Butuan, gipadayag sa opisyal nga human nila nasubmite kang Pangulong Duterte ang draft alang sa federal constitution, subling gipaneguro sa pangulo ngadto kanila nga dili na kini mag-extend pa o kaha magpa-reelect sa maong posisyon.
Dugang pa ni Pimentel, kinahanglan matud pang masabtan sa tanan nga ang termino sa pangulo sa tuig 2022 pa mahuman hinungdan nga bisan og wala na’y plano ang pangulo nga subling mudagan sa maong posisyon og sa kanunay niining pagpadungog-dungog nga mubiya na sa pwesto dungan sa bisan unsa mang hagit, kinahanglan pa gihapon niyang tapuson ang iyang termino.
Kini aron makita sa tanang mga Filipino ang maayong tumong sa pederalismo.
Dihang gisukmatan tungod sa dili matagna nga mood og huna-huna sa pangulo, gipadayag ni Pimentel nga kung pag-abot sa mapanhon ma-usab ang huyop sa hangin og gusto na sa pangulo nga subling mudagan sa maong posisyon, mikatawa lamang kini dungan sa pagbutyag nga ang katawhan pa gihapon ang masunod kung gusto nilang si Pangulong Duterte pa gihapon ang gusto nilang mudumala sa nasud.
Apan duna matud pa’y katungod ang tanan ilabina ang mga mediamen nga ipahinumdum sa pangulo ang mga gisaad niini higayong mu-abot ang adlaw nga ma-usab ang iyang huna-huna og gusto na niining subling dumalahon ang Pilipinas. (Beth Ruiz)
