BUTUAN CITY – Padayon karun nga gi-awhag ang katawhan nga pabakunahan ang ilang mga binuhi nga mananap ilabina sa ero aron malikayan ang rabies.
Kini ang nahimong pag-awhag ni Dr. Belen Aruelo, provincial veterinarian sa provincial government sa Agusan del Norte subay sa pagsaulog sa Rabies Awareness Month ning bulan sa Marso.
Sigon ni Dra. Aruelo nga kinahanglang mahimong responsable ang tag-iya sa mananap pinaagi sa pagpabakuna niini aron malikay sa rabies. Kinahanglan lang niini nga moadtu sa barangay ugaling dunay schedule sa pagbakuna sa mga mananap.
Lakip sa timailhan nga responsable kini nga tag-iya ugaling atimanon pag-ayo ang mananap pinaagi sa paghatag og saktong puy-anan og pagkaon.
Sumala pa niini nga dunay igong suplay sa bakuna ang Agusan Del Norte tungod kay gigahinan gyud kini og tinugi nga pondo ubos sa Rabies Prevention and Deradicalization Program.
Gi-awhag usab nila ang mga Local Government Unit nga maggahin usab og pondo aron makab-ot ang target nga 80 porseinto sa mga ero ang mabakunahan. Gipakusgan kini nga panawagan aron wala nay mabiktima pang tawo ilabina mga bata tungod sa rabies.
Gitumbok ni Dr. Aruelo ang mga bata tungod kay sagad kini dili mosulti sa ginikanan ugaling mapaakan og ero og masayran nalang kung mopakita na ang simtomas diin nianang higayona wala nay mabuhat aron masalbar pa ang kinabuhi.
Tungod niini, gibutyag sa doctor nga kung mapaakan og ero, hugasan kini sa limpiyo nga tubig og sabon dayun mudool sa Rural Health Unit aron matupukan og anti-rabies.
Kinahanglan usab nga dili pasipad-an ang nakapaak nga ero hinoon atimanon aron masuta kung dili ba kini magluya sulod sa 14 ka adlaw nga lakip sa basehan kung ipadayon ba an dose sa gitupok nga anti-rabies.
