BUTUAN CITY – Nangandam na ang team sa pambato sa Agusan del Sur sa himuong mga virtual activities alang sa Miss Earth 2021. Sa eksklusibong pakighinabi sa Bombo Radyo Butuan, gipadayag sa garbo sa San Luis, Agusan del Sur nga si Judie Ann Castro, nga nagsugod na kagahapon ang ilang inadlaw-adlaw nga kompetisyon hangtud nga mu-abot na sila sa coronation night nga himuon sa buwan sa Hulyo.
Iyang gibutyag nga suportado siya sa lokal nga kagamhanan ilabina sa mga biyaheng iyang himuon aron i-feature ang mga nindot kaayong talan-awon sa ilang lalawigan.
Dakong hagit alang kaniya ug sa iyang team ang virtual competition tungod kay sila mismo ang magtaud ug mag-arrange sa mga gamitong props sama sa stage diin siya murampa ug sa mga lights nga mas maghatag kanila og kalisod kung mag-brownout.
Ang iya lamang matud pang gikuptang pambato mao ang iyang determinasyong mudaog alang sa tanang mga Carganons sa ingon ma-inspire usab ilabina karong panahon sa pandemya.
Karon matud pa ang saktong panahon aron atong protektahan ang atong kalibutan ug gusto niyang mahimong inspirasyon sa tanan ilabina niadtong mg nagtinguhang protektahan ang kayutaan ug ang kalibutan.
