BUTUAN CITY – Gitay-og sa magnitude 5.8 nga linog ang sidlakang bahin sa Hokkaido, Japan kaganinang alas-1:40 sa buntag (oras sa maong nasud) samtang alas-12:40 sa kaadlawon – oras sa Pilipinas.
Sumala sa Japan Meteorological Agency, ang epicenter sa linog nahimutang sa habagatang-sodlakang baybayon sa Nemuro Peninsula ug adunay giladmon nga 40 kilometro.
Ang pagtay-og nahitabo sa utlanan sa duha ka tectonic plates, ug natala kini isip ikalima sa pinakataas nga lebel sa seismic intensity scale sa siyudad sa Nemuro.
Gikan sa inisyal nga magnitude 5.9, gi-downgrade kini ngadto sa magnitude 5.8.
Gipahimangnoan ang mga residente nga magmatngon sa posibleng aftershocks nga mahimong moabot sa magnitude 5.0 ug molungtad og usa ka semana. Taliwa sa kusog nga pagtay-og, wala’y hulga sa tsunami human sa maong linog.
