Si Juan Ponce Enrile usa sa labing dugay ug kontrobersyal nga politiko sa kasaysayan sa Pilipinas, nga namatay kagahapon Nobyembre 13, sa edad nga 101-anyos.
Ang iyang kinabuhi usa ka halangdon nga panaw gikan sa kalisod pa-ingon sa gahum, nga naglangkob sa kapin sa 60 ka tuig nga serbisyo sa gobyerno.
Natawo siya niadtong Pebrero 14, 1924 sa Cagayan, anak sa usa ka Spanish-Filipino nga abogado, ug usa ka magtutudlo sa baryo.
Nigradwar siyang cum laude sa University of the Philippines College of Law ug nakapasar sa bar exam niadtong 1954 nga adunay taas nga marka nga 91.72%.
Mi-abot sa walo ka mga presidente ang iyang naserbisyuhan sa Pilipinas, lakip na ang duha ka Marcos, duha ka Aquino, ug duha ka Macapagal.
Nahimo siyang defense secretary sa panahon ni anhing Pangulong Ferdinand Marcos Sr., ug usa sa mga arkitekto sa Martial Law.
Kabahin usab siya sa People Power Revolution niadtong 1986, nga miresulta sa pagkapukan sa diktadoriyang Marcos.
Nahimo siyang senador sa daghang termino, lakip na ang pagka-Senate President niadtong tuig 2008 hangtud 2013.
Nahimo usab siyang legal counsel ni Pangulong Ferdinand Marcos Jr. gikan niadtong tuig 2022 hangtod sa iyang kamatayon.
Atol sa kapin unom ka dekada niyang pagpanersbisyo sa sa publiko, nalambigit siya sa pipila ka mga kontrobersiya, apil na niini ang pork barrel scam niadtong 2014 apan nakapyansa siya tungod sa iyang edad ug estado sa panglawas.
Gikonsidera usab siya nga simbolo sa kalig-on sa politika, nga naka-survive sa duha ka gubat, duha ka pandemya, ug daghang krisis.
Namatay si Enrile sa pneumonia samtang naa sa intensive care unit kon ICU, ug gipahibalo sa iyang anak nga si Katrina nga siya namatay nga malinawon sa ilang balay nga gilibutan sa pamilya.
Gibiyaan niini ang iyang asawa nga si Cristina Castaner, ug mga anak nga si Jack Enrile ug Katrina Ponce Enrile.
Ang kinabuhi ni Enrile usa ka pananglitan sa pagkamalahutayon sa politika, apan usa usab ka pahimangno sa gahum ug kontrobersiya nga naglibot sa mga lider sa nasud.
Ang iyang papel sa kasaysayan nagpadayon sa mga diskusyon sa etika, demokrasya, ug pagdumala sa gobyerno.
