BUTUAN CITY – Nagpahimangno si retired Supreme Court Associate Justice Antonio Carpio nga posibleng mahimong trap alang sa Pilipinas ang joint oil and gas exploration ka-uban ang China sa West Philippine Sea.
Kini tungod kay gi-angkon na sa China nga sila ang tag-iya sa mga rekursos naturales sa maong parte sa kadagatan rason nga dili makatarunganon alang sa Pilipinas ang bisan unsa mang kasabutan.
Sa pagbisita ni Carpio sa Kalayaan Group of Islands, nakita niya ang presensya sa mga istraktura ug mga barko sa China sa pipila ka parte sa West Philippine Sea nga anaa sa sulod sa exclusive economic zone kon EEZ sa Pilipinas.
Pahimangno ni Carpio, angayang mag-igmat ang Pilipinas sa pakigsabot sa China ilabina nga pila ka higayon nang napamatud-an nga dili paborable sa Pilipinas ang mga desisyong pabor nang daan sa Pilipinas.
Una nang gibutyag ni Pangulong Ferdinand Marcos Jr nga bukas sila sa pakigsabot sa China alang sa posibleng energy cooperation samtang gipamugos usab sa Department of Foreign Affairs nga wala pa’y final joint exploration sa kasamtangan.
Padayon usab nga gibutyag sa China nga duna’y positibong kalambuan sa mga panagsabot apan nagpabiling sensitibo kini tungod sa bangi sa sobereniya sa gi-ilugang teritoryo.
