BUTUAN CITY – Tulo ka mga sakyanan ang nasunog kagahapong adlawa sa gawas nga bahin sa compound sa Butuan City Police Station 1 kansang damyos gibana-banang mi-abot sa ₱60,000.00SUV.
Sumala ni Fire Insp. Ronald Vasquez, City Fire Marshal sa Bureau of Fire Protection-Caraga Butuan City Central Fire Station, apil sa nasunog ang usa ka multicab, motorsiklo ug usa ka Sports Utility Vehicle kon SUV.
Sa pakighinabi ning sibyahan, gibutyag sa opisyal nga nagsugod pag-ulbo ang kalayo bandang alas-12:40 ang takna sa udto gikan sa multicab ug gisuta pa ang hinungdan niini. Tambag sa opisyal, kinahanglang mag-amping sa mga sakyanan karong grabe ka-init sa panahon, diin sa nakalabay nga duha ka adlaw, duna nay tulo ka mga pagkasunog sa mga sakyanan ang natala sa managlahing lugar sa Agusan del Norte.
Dugang sa opisyal, kinahanglang ablihan og gamay ang bintana sa sakyanan ugaling biyaan kini ilawom sa naglagiting nga silaw sa adlaw aron duna’y hangin nga makasulod.
