BUTUAN CITY – Dunay punto si Senador Bato dela Rosa sa pagbabag niini sa impeachment complaint batok kang Vice President Sara Duterte, ilabina sa sumbingay niining kinahanglang dunay himoong kabag-ohan sa pundasyon sa balay ugaling masayran sa tag-iya niini nga sayop diay ang nasangpit nga pundasyon.
Sigon ni political analyst Atty. Orly Montalban, bisan siya nakurat sa dili matud pa ideal nga lakang nga gihimo sa Senado ngadto sa impeachment complaint batuk kang Vice President Sara Duterte, kansa gi-remand sa ubos-balay balaoranan aron i-sertipika kung nasubay ba kini sa 1 year bar rule sa impeachment complaint.
Saysay sa abugado, kining duha matud pa ka isyu karon ang giatubang sa mga mambabalaod ingon man sa mga eksperto sa balaod, tungod kay walay ni-isa kanila, lakip na ang mga framer sa Philippine Constitution, nga naka-anticipate sa maong mga kakulian sa balaod.
Dugang ni Atty Montalban, naghatag karon og kalibog sa pagbalik sa impeachment complaint ngadto sa ubos balay-balaoranan bisan nga anaa na kini sa Senado, kansa bugtong nakasulat lamang sa batakang balaod nga igo na lang silang mutaral ug magdesisyon niini.
Kinahanglan usab nga resolbahon kung legal ba usab ang gihimo sa mga kongresista sa wala paghimo og aksyon sa tulo ka mga complaint sulod lang sa duha ka bulan, ug igo ra lamang sila nagkapuliki og pasa niini sa House speaker ug sa Senado sa ika-upat na nga complaint.
Ang maong pangutana nagsumikad sa nakalatid usab sa Konstitusyon nga kinahanglang usa lamang ka complaint ang mapirmahan sa House Speaker sulod sa usa ka tuig base sa 1 year bar rule.
Hangyo sa abogado, tabangan nalang sa mga Pilipino og ampo ang nasod alang sa kalambuan niini pinaagi sa tul-id nga mga balaod ug hapsay nga katubagan sa gi-atubang nga mga isyu sa katilingban.
