BUTUAN CITY – Padayon pang gipanubayan sa Butuan City Police Office kon BCPO ang ‘Jenotec’ nga mao matud pa ang bag-ong pangalan karon sa kabus Padatoon kon KAPA Community Ministry International Inc. dinhi sa dakbayan sa Butuan.
Sa eksklusibong pakighinabi sa Bombo Radyo Butuan, gipadayag ni BCPO spokesman PCaptain Emmerson Alipit nga migawas sa ilang gihimong pakisusi nga sama sa pagtaya sa bitcoin ang modus niini.
Gibutyag niining duna matud pa’y ubang mga membro kaniadto sa KAPA nga nagpa-revalidate sa pangindahay nga makuha ang ilang na-invest nga kwarta samtang duna’y ubang mga membro nga nagpakisusi lang.
Wala pa nila makuha ang kinatibuk-ang bag-ong pangalan sa maong investment scam sa rasong wala kini ma-memorize sa mga membro tungod sa katas niini.
Lakip sa nakuha nilang impormasyon ang pagproseso na matud pa ug business permit sa maong grupo ug ang pagpa-accredit nila sa Securities and Exchange Commission kon SEC.
