BUTUAN CITY- Giklaro ni Jeffrey “Ka Eric” Celiz, Secretary General sa Bangon Sambayanan, nga ang gipasakang cyberlibel batok kaniya sa National Bureau of Investigation kon NBI kalabot sa gi-ingong fake medical certificate ni President Ferdinand Marcos Jr, nga wala matud pa kini mag-post sa maong dokumento ug ang iyang gibuhat mao lamang ang paghatag og patas ug objektibong komentaryo bahin sa kahimtang sa panglawas sa Presidente, human sa opisyal nga medical bulletin nga gipagawas ni Presidential Communications Office Undersecretary Claire Castro.
Saigon pa ni Celiz, nga kini usa ka porma sa harassment ug intimidation aron mapahimutang ug mapahilom ang mga kritikal nga komentaryo sa social media batok sa gobyerno.
Gibutyag usab niini, nga wala pa kini nakadawat og subpoena o kopya sa reklamo gikan sa NBI ug nakabalo lamang kini niini pinaagi sa media release. Nagplano usab matud pa kini, nga mangayo og tambag sa mga abogado o mosusi sa Department of Justice aron klarohon ang status sa kaso, samtang iyang gihulagway ang operasyon sa NBI nga daw estilo sa martial law kansa nagpasakit ug nagpasuko sa katawhan.
Dugang pa ni Celiz, nga gipasaka-an usab kini sa NBI ug PNP-CIDG og kasong cyberlibel ug inciting to sedition uban sa laing pang mga abogado nga konektado sa oposisyon.
Matod ni Celiz, bisan pa og granting nga si Jayson o uban pa nga nakashare sa maong dokumento, dili kini ang hustong tubag sa isyu; ang angay matud pang buhaton sa gobyerno mao ang paghatag og klaro ug tinuod nga impormasyon, inay ang paggamit sa gahum aron mangduot ug manupil. Gipasi-ugda usab niini, nga nagtinabangay ang NBI, CIDG ug PNP sa taktikal nga pagpanghadlok nga susama sa mga pamaagi nga gigamit sa panahon sa administrasyong Duterte ug Marcos Sr.
Gipasi-atab usab niini, nga mingmugna og Cyber Crime Surveillance Unit ang NBI diin nagpasabot nga gisubay ug ginamonitor ang mga independent postings sa social media, kansa nakalapas sa katungod sa katawhan sa gawasnong pamahayag ug kritikal nga komentaryo batok sa korapsyon ug abuso sa gobyerno
