BUTUAN CITY – Nasuta sa gipagawas nga mga dokumento sa US Department of Justice (DOJ) nga ang namatay nga sex offender nga si Jeffrey Epstein, nag-hire matud pa og team nga nakabase sa Pilipinas aron papason ug tabunan ang negatibong impormasyon mahitungod kaniya nga anaa sa internet.
Base kini sa mga dokumentong nakuha sa Estados Unidos, apil na ang mga email exchanges nila Epstein ug ni Al Seckel, nga asawa sa igsoon ni Ghislaine Maxwell— ang kanhi hinigugma ug nag-unang ka-abag ni Epstein sa pagpanguha og mga menor de edad.
Madumdumang si Maxwell, nahukman niadtong 2021 may kalabutan sa sex trafficking crimes ni Epstein.
Sumala sa mga emails, naglusad og organisadong kampanya ang grupo aron manipulahon ang online search results, lakip ang paghimo og mga website ug positibong link nga naghulagway kang Epstein isip philanthropist.
Nakalatid usab sa mga dokumento nga gitabangan sa Philippine-based team ang pagtangtang sa pipila ka negatibong search terms sa Google ug pag-edit sa Wikipedia page ni Epstein aron dili makita ang iyang mga kaso.
Madumdumang gi-aresto si Epstein niadtong 2019 tungod sa sex trafficking, ug namatay siya samtang nabilanggo sa New York sa susamang tuig.
