BUTUAN CITY – Duda ang negosyanteng Butuanon nga si Oliver Terante sa mahimong resulta sa imbestigasyong himuon sa gimugnang independent commission batuk sa anumalusong mga flood control projects.
Sa eksklusibong pakighinabi sa Bombo Radyo Butuan, gipadayag ni Terante nga wala na malipay ang katawhang Filipino sa kada-adlaw nga dagan sa kontrobersiya ilabina wala pa’y kongkretong aksyon nga nakita sa wala’g tuo nga imbestigasyon.
Gihimo pa niining panaglitan ang nangaging mga panghitabo kondiin ang mga nakasuhan ug nahukmang mga plunderers, mibalik pagserbisyo sa gobyerno.
Gani sa dagan matud pa karon sa imbestigasyon sa Senado ug Kamara, pagpangguba lang ug pagpanglingla sa tinuod nga nagakahitabo ug kini ang hinungdan nga nasuko na ang katawhang Filipino tungod kay maklaro nga drama lang ang nahitabo karong mga imbestigasyon.
Gikatingala usab niini ang wala man lang pagpagawas og posisyon ni Butuan City Congressman Jose ‘Joeboy’ Aquino II nga padayong nagpakahilom taliwa sa ka-init sa isyu.
Ang padayong pagpakahilom matud pa sa kongresista, maoy magtukmod sa mga tawo nga muhatag sa ilang kaugalingong espekulasyon ilabina nga dayag ang suod nga relasyon niini kang House Speaker Martin Romualdez, kinsa gikutay sa mga Discaya nga duna matud pa’y porsiento sa ilang nakuhang mga flood control projects gikan sa gobyerno.
