BUTUAN CITY – Nadiskubrehan sa gihimong inspeksyon ni Department of Public Works and Highways (DPWH) Sec Vince Dizon ang gika-ingong iregularidad sa ₱96.5-milyon nga flood control project duol sa Culaman Bridge, lungsod sa Jose Abad Santos, Davao Occidental, nga gipondohan niadtong 2021 hangtod 2022.
Dako ang kakurat ug kasuko ni Secretary Vince Dizon human personal nga nasuta nga klarong bag-o pa lang nagsugod ang konstruksyon, bisan pa man sa kamatuoran nga fully paid na kini.
Nakabalikas sa kasuko ang kalihim sa iyang nadiskubrehan dayong mando kang District Engineer Rodrigo Larete nga isubmite ang tanang dokumento sa mga proyekto sa ilang distrito.
Gikumpirma ni Larete nga nadawat na sa contractor nga St. Timothy Construction Company, nga gipanag-iya sa pamilya Discaya, ang kinatibuk-ang bayad, bisan pa man walay klarong kalambuan sa maong flood control project.
Matud pa sa pipila ka residente, dugay na nilang gihuwat ang pasilidad nga untà magahatag og proteksyon batok sa pagbaha sa ilang komunidad ug sa kasikbit nga eskwelahan. Apan hangtod karon, wala pa gyud silay nakita nga konkretong resulta.
Nagpadayon ang imbestigasyon sa DPWH bahin sa maong proyekto, ug gisiguro sa Sekretaryo nga panagutan ang tanang mapamatud-ang nalambigit sa anomalya.
