BUTUAN CITY – Giklaro ni Atty. Riza Ann Constantino, provincial election supervisor sa Commission on Elections kon COMELEC-Surigao del Sur atol sa press conference nga dili tinuod kon peke, ang migawas nga taho sa social media nga gibutang sulod sa panimalay sa kongresista sa ilang lalawigan ang mga election paraphernalia.
Sigon sa opisyal, ang post sa social media nga anaa sa panimalay sa nagpa-reelect nga kongresista sa unang distrito sa Surigao del Sur ang comelec paraphernalia, nagsumikad sa emplayado sa maong kongresista.
Sigon ni Atty. Constantino, dili tinood ang maong mga hulagway ug base sa ilang pakisusi, gi-craft lang kini aron dauton ang maong kongresista.
Apan gibutyag sa abogado nga na-alarma usab ang ilang opisina tungod sa maong balita lakip na ang mga botante gumikan kay mabutang man sa peligro ang kridibilidad sa election.
Sa gihimong pakisusi, gi-edit lang matud pa ang maong mga hulagway nga kuha sa Cebu City tungod kay klarong peke dili haom nga serial number sa migawas sa maong social media post ug sa miabot nilang kagamitan.
Gitumbok usab niini nga anaa lang sa Tandag City ang maong mga paraphernalia.
