BUTUAN CITY – Gisugdan na karong adlawa dinhi sa dakbayan sa Butuan ang pagpatuman sa enhanced community quarantine kon ECQ subay sa mas gipahugtang lakang sa local nga kagamhanan kontra COVID-19.
Sa eksklusibong pakighinabi sa Bombo Radyo Butuan, gipadayag ni May Diez – tigpamaba sa Butuan City government nga tumong niini nga wala na’y mga tawo nga magsuroy-suroy pa sa kalsada kung wala’y importanteng tuyo.
Giklaro ni Diez nga epektibo na usab karon ang pagpangita og quarantine pass sa mga tawong anaa sa dalan ug kadtong mulabay sa quarantine control points apil na ang hugot nga pagdili sa paghatag og produktong paliton sa mga tawong wala’y dalang home quarantine pass.
Dili na usab makalabay sa mga chekcpoints ang mga trabahanteng wala’y mapakitang work pass o kaha ID o company certification niadtong wala pa ma-isyu og work pass tungod sa kawala pa’y na-imprinta sa barangay diin kini nagpuyo.
Ang hugot nga pagpatuman sa ECQ gi-coordinate na sa Incident Management Team ning siyudad ngadto na sa mga hingtungdang ahensya sa gobyerno sama sa kapulisan, kasundaluhan, Department of Health og uban pang mga personaheng nag-man sa mga quarantine control checkpoints.
