BUTUAN CITY – Gi-angkon sa Israeli military nga ang “operational misunderstanding” o “professional failures” ang hinungdan sa kamatayon sa 14 ka mga emergency workers ug mga staff sa United Nations kon UN sa Gaza niadtong Marso 23 ning tuig 2025.
Sumala sa datus nga gipagawas pinaagi sa internal inquiry sa Israel Defense Forces (IDF), daghan sila og kapakyasan, lakip niini ang paglapas sa mga mando nga miresulta sa kamatayon sa UN staff.
Gi-angkon sa IDF nga gitiro nila ang convoy nga gilangkuban sa mga ambulansya sa Palestinian Red Crescent Society, sakyanan sa UN, ingon man fire truck tungod sa taho nga nagdala matud pa kini og hulga sa mga sundalo sa Israel.
Sumala sa report, hatud matud pa ang maong operational misunderstanding sa “poor night visibility” ug sa paspas nga pag-abot sa maong mga sakyanan sa combat zone.
Dugang gi-angkon sa Israel, wala matud pa dayon nila kini naila nga mga emergency responders.
Samtang ginegar usab sa UN ang taho sa IDF nga wala’y suga ang maong mga sakyanan tungod sa gipagawas nga video sa usa sa mga medics kansa nagpakita nga naka-on ang mga suga sa nasangpit nga mga sakyanan ingon man ang mga emergency signals usab niini.
