BUTUAN CITY – Nagproblema karon ang mga mangingisda sa Purok 8, Sitio Tinago Brgy. Matabao, lungsod sa Buenavista, Agusan del Norte tungod sa sobra kadaghan sa mga isdang tamban nga ilang nakuha kaganinang kaadlawon atol sa ilang pagpangisda.
Nasayrang tungod sa dili na ma-ato kadaghan sa mga isda, nag-iyahay na og post sa Facebook ang uban kanila nga nanawagan sa katawhan nga mudalikyat na sa ilang lugar bitbit ang mga sudlanan tungod kay libre na nila kining ipanghatag.
Sigon sa usa sa mga mangingisda nga si Rene Chiong, nagsugod sila sa iyang mga igsoon pag-adto sa lawod kaganinang alas-dos sa kaadlawon ug nakabalik siya pasado ala-una na sa hapon karga ang sobra kadaghang mga isda.
Gani tungod sa grabe kadaghan, iya nang gipangyabyab ang iyang pukot didto sa lawod tungod usab sa grabe kabug-at na niini alang sa iyang bangkang panagatan.
Gikatingala nila ang maong insidente kansa sayang tungod kay dili man ma-ato ang pag-dispose niini ilabina nga daghan na ang nangalata rason nga ilubong na kini.
