BUTUAN CITY – Daghan na kita og nadunggan nga mga makatandog sa dunggan nga panaghigalaay sa mga mananap ug mga tawo kondiin bisan ang mga bangis nga mananap sama sa liyon ug tigre, dili mulubad ang ilang gugma ngadto sa mga tawong nag-atiman kanila bisan pa og unsa na sila kadako.
Ingon niini usab ang 25 ka tuig na nga panaghiglaay sa usa ka diver sa Japan ug sa usa ka isda nga gitu-uhan sa kadaghanan nga dili mahitabo.
Unang nakita ni Hiroyuki Arakawa ang isda nga ginganlan niya og Yoriko dihang anaa siya sa trabaho human gi-assign nga maoy musuperbisa sa usa ka ‘torii’ – usa ka balaang shrine sa Shinto religion.
Ang naka-espesyal sa maong shrine tungod kay anaa kini ilawom sa Tateyama Bay sa Japan kondiin kinahanglan ni Arakawa nga mu-dive ngadto sa ilawom sa tubig aron i-explore ang mga marine creatures nga nagpuyo dinhi.
Sa napulo ka tuig nga paghimo ni Arakawa sa ilyang trabaho, iyang nakita si Yoriko hangtud nga kada-adlaw na silang magkakita ug hangtud karon, makita ang ilang kasuod tungod kay dili man kini biyaan sa Asian sheepshead wrasse kung anaa kini sa ilawom sa tubig.
