BUTUAN CITY – Mi-abot na sa dili mu-ubos 538 ka mga tawo ang natalang patay sa gipahigayon nga crackdown batok sa nasudnong mga protesta sa Iran, samtang kapin sa 10,600 pa ang nadakpan sulod sa duha ka semana, sumala sa U.S.-based Human Rights Activists News Agency.
Nagpahimangno usab ang Tehran nga ang militar sa Estados Unidos ug Israel mahimong “legal target” kung gamiton sa Amerika ang kusog aron panalipdan ang mga demonstrador.
Nagpabiling lisod ang pagbana-bana sa sitwasyon tungod sa internet blackout ug pagputol sa mga linya sa telepono, samtang nagpadayon ang dagkong demonstrasyon sa Tehran ug Mashhad.
Nasayrang naghatag og suporta si US. President Donald Trump sa mga nagprotesta dayong butyag nga andam ang Amerika andam motabang, samtang ang mga opisyal sa White House nagtimbang-timbang pa sa posibleng tubag lakip na ang cyber attacks ug direktang military strikes.
Mipataas sa tensyon ang pamahayag ni Speaker Mohammad Baagher Qalibaf nga ang tanang military base sa US ug Israel mahimong target sa Iran kung magsugod ang atake, samtang ang mga magbabalaod misyagit og “Kamatayon sa Amerika” sa plenaryo.
Nagpadayon ang kalihukan sa kadalanan bisan pa sa hulga sa dugang nga pagpitol, samtang ang krisis sa ekonomiya ug paghuyang sa Iranian rial mao ang nagpaluyo sa pinakadako nga mga protesta sa maong nasud.
