BUTUAN CITY – Gidugang sa European Union sa ilang listahan sa mga teroristang grupo ang Islamic Revolutionary Guard Corps kon IRGC sa Iran isip tubag sa makamatay nga pagpanglupig sa Tehran batok sa mga nagprotesta sa mi-aging mga semana.
Sigon sa pinakataas nga diplomat sa bloc nga si Kaja Kallas, ang maong lakang magbutang sa IRGC— kansa usa ka dako nga pwersa sa militar, ekonomiya, ug politika sa Iran — sa susamang lebel sa mga jihadist groups sama sa al-Qaeda ug Islamic State in Iraq and Syria kon ISIS.
Sigon ni Iranian Foreign Minister Abbas Araghchi, ang desisyon sa EU usa ka dakong sayop. Nasayrang gipadayag sa mga human rights groups, nga liboan na ka mga nagprotesta ang napatay sa mga pwersa sa seguridad, lakip ang IRGC, sa pila ka semana nga kagubot niadtong Disyembre ug Enero.
Gani, gitawag pa kini ni French Foreign Minister Jean-Noel Barrot nga pinakabayolenteng pagpanglupig sa modernong kasaysayan sa Iran dayong butyag nga walay lugar ang impunity alang sa mga krimeng nahimo.
Sa una, nakita ang France nga nagduha-duha sa pagdugang sa IRGC sa teroristang listahan sa EU tungod sa kahadlok nga mahimo kining moputol sa tanang diplomatikong relasyon sa Iran.
Apan niadtong Miyerkules, giusab sa France ang ilang posisyon ug kusog nga misuporta sa panawagan sa pag-blacklist sa grupo, nga gipangulohan sa Italy.
