BUTUAN CITY- Pormal na nga gi-tudlo isip ika-tulo nga supreme leader sa Iran ang 56-anyos nga si Mojtaba Khamenei, dungan sa paglusad sa nasud og missiles batok sa Israel isip unang lakang sa iyang liderato human mamatay ang amahan niini.
9 ka adlaw ang minglabay dihang napatay si Ayatollah Ali Khamenei sa gihimong strikes sa Amerika ug Israel, gi-anunsyo sa state television nga 88-member Assembly of Experts ang pagkatudlo sa batan-ong Khamenei.
Gi-insistar sa maong clerical body nga dili sila mag magduha-duha sa ilang desisyon taliwala sa agresyon sa Amerika diin giila niini nga kriminal.
Isip pagpakita og pwersa, gipagawas sa state media ang mga projectile nga gibuhian padulong sa Israel nga adunay nakasuwat nga “At Your Command, Sayyid Mojtaba”.
Gawas niini nakadungog usab og mga pagbuto sa Qatar, kung asa makit-an ang usa ka dakong air base sa Amerika. Na-ila ang bagong lider isip usa ka hardliner kansa gila-umang magpatuman og hugot nga polisiya sa iyang amahan.
Sa wala pa ang giyera, liboan ang namatay dihang gibuwag sa security forces sa Iran ang mga halapad nga protesta batok sa gobyerno. Samtang, ming-ani usab og dirketa nga hulga ang pag-ingkod ni Mojtaba gikan sa Amerika ugIsrael.
