BUTUAN CITY – Gi-anunsyo ni Iranian President Masoud Pezeshkian nga undangon nila ang missile attacks sa mga silingan nga nasod sa Middle East gawas lang kung adunay mu-una pag-atake gikan sa Gulf states.
Gipadayag kini sa Iranian president human siya gisultihan sa Interim Leadership Council, nga temporaryo nga nagdumala sa Iran, nga ipahunong ang mga pag-atake batok sa silingan nga nasod gawas kung adunay magsugod sa agresyon.
Sa usa ka pre-recorded televised address sa state media, nangayo usab ug pasaylo ang Iranian President sa Gulf states dayong butyag nga kinahanglan nga masulbad kini pinaagi sa diplomasya imbes nga gubat ug problema sa silingan nga nasod.
Gihangyo usab niya ang Gulf nations nga dili mahimong dulaan sa kamot sa imperyalismo dayong hangyo nga dili atakehon ang teritoryo sa Iran.
Gi-isip kini nga usa ka dakong kalamboan ilabina ang iyang anunsiyo ug paghangyo ug pasaylo human sa usa ka semana sukad nagsugod ang pag-atake sa Amerika ug Israel kanila resulta sa ilang pagbalos usab og pag-atake sa Israel sa mga base militar sa Estados Unidos nga anaa sa Gulf states.
Samtang, nagdumili gihapon ang Iran nga musurender human gipadayag ni US President Donald Trump nga matapos lamang ang giyera kung mosurender ang Islamic country nga wala’y kondisyon.
