BUTUAN CITY – Nag-anunsyo si Iranian supreme leader Ayatollah Ali Khamenei og lima ka adlaw nga pagbangutan isip tubag sa gibutyag niyang pagka-martir sa gipatay nga si Hezbollah leader Hassan Nasrallah.
Iyang gibutyag nga dili mahimong dili ipanimalos ang pagpatay sa Israel kang Nasrallah kinsa gihulagway niya nga usa ka dalan ug tunghaan sa pangisip nga magpadayon bisan pa man sa iyang pagkawala. Gitaho usab sa Iranian media nga napatay sa Israeli airstrikes sa Beirut ang usa ka heneral sa Iranian Revolutionary Guards.
Tungod sa nagpadayong tensyon, gikabalak-an karon nga posibleng mukalyap pa ang giyera sa rehiyon dul-an usa ka tuig sa cross-border fighting tali sa Israel ug Hezbollah tungod sa pag-atake sa Hamas sa Israel niadtong Oktubre 7 ning mi-aging tuig nga miresulta sa giyera sa Gaza Strip.
